“Нээлттэй, цэгцтэй - Ардчилсан Нам” үндэсний аяны нээлт өчигдөр боллоо. Энэ үеэр Ардчилсан намын Ерөнхий нарийн бичгийн даргын үүрэг гүйцэтгэгч Д.Амарбаясгалан аяны талаарх танилцуулгыг хийв.

Тэрбээр “Ардчилсан нам өнөөдрөөс цахим шилжилтийг эхлүүлж байна. Цахим бүртгэлийн аянд есөн дүүрэг, 21 аймаг, 330 суманд байгаа Ардчилсан намын 200 гаруй мянган гишүүд маань идэвхтэй хамрагдсанаар цаашид дотоод сонгуулиа зохион байгуулах, саналын эрхтэй гишүүдийн суурь бүртгэл бүрэн хангагдана.

Намын гишүүд маань бүртгэлээ хийлгэж, гишүүний татвараа төлж, Ардчиллын гэрэгэ гардан авснаар дотоод сонгуульдаа саналын эрхтэй оролцох, мөн сонгуульт гишүүнд нэр дэвших эрх нээгдэнэ. Урьдчилсан байдлаар дөрөвдүгээр сарын 08-нд Ардчилсан намын Их хурлыг товлож байгаа. Тэр хүртэлх хугацаанд бүх шатны дотоод сонгуулийг улс орон даяар зохион байгуулахаар ажиллаж байна. гэв.

Өчигдрийн энэхүү арга хэмжээнд 21 аймаг, есөн дүүргийн ХЭГ-ын дарга нар, улс төрийн ажилтнууд, Улс төрийн зөвлөлийн гишүүд хамрагджээ.