Монгол Улсын Ерөнхий сайд Г.Занданшатарын захирамжаар байгуулагдсан “Экспортыг нэмэгдүүлж худалдааг дэмжих” ажлын хэсгийн ээлжит хурал өнөөдөр (2025.08.19) боллоо.
Хуралдаанд ажлын хэсгийн ахлагч Тэргүүн шадар сайд бөгөөд Эдийн засаг, хөгжлийн сайд Н.Учрал, Сангийн сайд С.Жавхлан болон албаны бусад төлөөлөл оролцлоо. Хуралдаанаар уул уурхайн биржийн арилжааг идэвхжүүлэх зарим арга хэмжээний тухай, төмөр замын тээвэрлэлтийг нэмэгдүүлэх нөхцөлийн талаар мэдээлэл сонсож Засгийн газрын хуралдаанд танилцуулахаар боллоо.
“Экспортыг нэмэгдүүлж худалдааг дэмжих” ажлын хэсэг өнгөрсөн нэг сарын хугацаанд гаалийн байгууллагын нийтлэг журамд өөрчлөлт оруулах, хүнээс хамаарсан олон үйлдлийг багасгаж хялбаршуулах, тээврийн хэрэгслийн хил нэвтрэх хүсэлтийг И-Монголиа системээр авдаг болох зэрэг ажлуудыг эхлүүлээд байна.
Энэ хугацаанд төрийн байгууллагын хүнд суртлыг бууруулж бизнесийн орчныг сайжруулах хүрээнд бизнес эрхлэгч ААН болон хувь хүмүүсээс 17000 гаруй санал ирсэн байна. Ажлын хэсгийн дараагийн хурлаар саналуудыг шийдвэрлэх арга хэмжээ авах, зөвшөөрөл олгодог төрийн цахим системүүдийг нэгтгэж илүү ойлгомжтой хүртээмжтэй болгох чиглэл өглөө.