Ээж, аавууд хүүхдийнхээ юу хүсэж байгааг мэдэлгүй, тэдний өмнөөс аливаа шийдвэр гаргах нь элбэг.  Харин тэдний төлөөлөл болсон 1-12 дугаар  ангийн сурагчид үе тэнгийхэндээ, ээж аавдаа, томчууд бидэнд юу гэж хэлэхийг хүсдэгийг сонирхлоо. Хүүхдүүд үе тэнгийнхнийхээ төлөө санаа зовж, тэдний эцэг, эхчүүдэд ч үгээ хэлж байна. Бага ангийн хүүхдүүд ээж аавтайгаа хамт байхыг хүсдэг бол, дунд ахлах ангийнхан тэдэнтэйгээ илэн далангүй  ярилцахыг хүсдэг аж. Насанд хүрэгчид та бүхэн нэгийг бодож, хоёрыг тунгаана биз ээ. 

Нэгдүгээр  ангийн сурагч Г.Амин-Эрдэнэ: 

-Би намар хоёрдугаар ангид орно. Сургуульд сурах үнэхээр гоё. Ангид суугаад хичээл хийх нь хамгийн гоё байдаг. Том хүмүүс биднийг сайн ойлгодоггүй юм шиг санагддаг. Жишээ нь, Билгүүнтөгс миний нуруу руу маш хүчтэй цохиод би уйлсан юм л даа. Гэтэл томчууд зүгээр үү л гэж асуудаг. Би маш их өвдөж байхад намайг эмнэлэг авч яваад эмчид үзүүлж болдоггүй юм болов уу. Бас үймүүлж болохгүй гэдэг ч, биднийг яагаад тэр зүйлийг хийж байгаа талаар асуудаггүй. Аав минь л намайг сайн ойлгодог доо. 

Хоёрдугаар ангийн сурагч О.Энхзаяа: 

-Чөлөөт цагаараа зураг зурах дуртай бас хоёр дүүтэйгээ тоглох дуртай. Миний аав Еэвэнгийн захирал. Би аавыгаа мөнгө ахиу олоосой гэж боддог. Миний аав бидэнтэй байх цаг бага. Гэртээ байх  үедээ янз бүрийн хоол хийж өгдөг.Тахианы махтай хоолонд нь би бүр ч их дуртай. Ээж маань хумс буддаг. Ээжийгээ тураад, улам л хөөрхөн болоосой гэж боддог. Хүүхдийн баяраар Консунигийн байшинтай тоглоомтой л болмоор байна.

Гуравдугаар ангийн сурагч Д.Цогтбилэг: 

-Үе тэнийн найзууд маань онц сураад, мундаг хүн болоо­сой гэж хүсдэг. Би илүү гарсан мөнгөөрөө дүүдээ эсвэл, найзууддаа гоё юм авч өгдөг. Аав, ээж маань хоорондоо эв­тэй байгаасай. Мөнгө чухал биш,  дүү бид хоёрыг хайрлаж, халамж­лах нь хамгийн чухал юм. Хүн хүндээ сайхан хан­да­хыг хайр гэж боддог.  Архи уусан хүмүүс муухай харагд­даг болохоор битгий ууж хүмүүсийг зовоогоосой гэж хамгийн ихээр хүсдэг. Том хүмүүс архи  уухаараа хүүх­дүүдийг зовоодог.

Дөрөвдүгээр ангийн сурагч Н.Номундарь: 

-Хичээлдээ явах хамгийн сайхан. Аав ээжтэйгээ хамт байх л хамгийн сайхан. Ном унших дуртай. Айдасгүй, ааваараа хүргүүлэхгүйгээр хичээлдээ явдаг бол мөн гоёо. Манай эмээ өндөр настай хүн байдаг. Хэрэвзээ би ааваараа сургуульдаа хүргүүлдэггүй бол аав минь эмээ дээр байнга очно шүү дээ. Ном унших дуртай. Ээж аав хоёр байнга ном авч өгдөг.

Тавдугаар ангийн сурагч Б.Энх-Эрдэнэ: 

-Би Ерөнхийлөгчөөс хотыг маань хоггүй болгоод өгөөч гэж хүсмээр байна. УИХ-ын гишүүд дэмий хэрэл­дэж суухаар хотоо хог­гүй, сайхан болгох талаар ажил­лаач гэж хэлэхийг хүс­дэг. Бас ангийхандаа хан­даж хэлэхэд, хоорондоо зодол­до­хоо болиорой. Ангийн авар­гыг зодооноор биш сур­ла­гаар шалгаруулдаг болъё. Сайн зодолддог байсан ч хи­чээ­лээ хийхгүй бол том болоод муу хүн болно.

Зургадугаар ангийн сурагч П.Нанзад: 

-Удахгүй улсын шалгал­тууд эхэлнэ. Тиймээс үеийн­хэндээ хандаж улсын шал­гал­таа сайн өгөөрэй гэж хэлье. Харин томчуудад хан­даж хүүхэдтэйгээ хааяа цаг гаргаж ярилцаж байгаарай гэж хэлмээр байна. Аав, ээждээ хичээлээ сайн давтаж, сайн хүн болохын төлөө хичээнэ ээ гэж хэлье.

Долдугаар ангийн сурагч Б.Гантулга: 

-Би хөлбөмбөг тоглох дуртай. Тиймээс найзуудаа спортоор хичээллээрэй гэж хүсч байна. Заримдаа өдөржин тоглоод аав, ээжийгээ гомдоох үе байдаг. Намайг уучлаарай гэж хэлье. Томчууд та бүхэн хүүхдээ хайрлаж байгаарай. Аав, ээжгүй, найз нөхөдгүй бол хүүхдүүд ганцаардана. Тиймээс хүүхдээ хайрлаж, аав ээжтэй нь хамт байлгаарай гэж хэлье. 

Наймдугаар ангийн сурагч Б.Алтанбаяр:  

-Үе тэнгийн найзууддаа үнэ цэнтэй байгаарай гэж хэлье. Хүүхэд бүхэн жаргалтай байгаасай гэж хүсдэг. Томчууд бол хүүхдэд зөв үлгэр дууриалал үзүүлэх ёстой хүмүүс. Тиймээс орцонд хогоо хаяж болохгүй шүү  Мөн гадаа гудамжинд, машиныхаа цонхоор хогоо хаяж байгаа хүмүүс муухай харагддаг. Соёлтой байцгаая. Мөн архи битгий уугаарай, тамхи ч бас хортой учраас битгий татаарай гэж томчуудаас хүсмээр байна. 

Есдүгээр ангийн сурагч Г.Билгүүн: 

-Цаг хугацааг дэмий зүйлд зар­­цуулахгүй, өөрий­гөө хөг­жүү­лэх нь ирээ­дүйд нь хэрэг­тэй шүү. Том­чууд хүүх­дээ юу хү­сэж мөрөөд­дөгийг мэдэх­гүй хэрнээ,  муу авсанд нь заг­на­­даг. Гэтэл хүүхдээ яагаад муу авсныг асууж, хамт шийд­вэр­­лэ­­вэл маш их тус­ламж бол­дог юм. Хааяа аав, ээжийн дүгнэлт үнэн байдаг боло­хоор хүү нь алдаанаасаа суралц­даг юм шүү. Өдий зэрэг­­тэй хүн болгож хүмүү­жүүл­­сэн аав, ээж­дээ баяр­ла­лаа. Хайр­­тай шүү гэр бүлийн­хэн­дээ.

Аравдугаар ангийн сурагч Б.Нандин-Эрдэнэ:  

-Би том болоод яг ээж шигээ ээж болно гэж боддог. Ээж маань миний хамгийн сайн найз. Найзууддаа хэлдэг бүх нууцаа ээжтэйгээ хуваалцдаг. Миний хамгийн сайн зөвлөгч байдаг ээждээ баярлалаа. Бас биднийг юугаар ч дутаадаггүй аавдаа маш их баярлалаа. Би ээж аавтайгаа бүх зүйл дээр нээлттэй байдаг. Үеийнхээ хүүх­дүү­дэд ч гэсэн ээж, аавтай­гаа нээлттэй байгаарай гэж хэл­мээр байна. Миний үеийн хүүх­дүүд одоо 15 настай. Бидний үеийн­хэнд тулгардаг олон асуу­дал бий л дээ. Тэр болгонд хам­гийн түрүүнд ээж, аавдаа л хан­даа­рай. 

Арваннэгдүгээр ангийн сурагч Д.Энх-Үйлс: 

-Үе тэнгийхэндээ хэлэхэд,  хичээ­­лээ бүрэн сайн судлаад, ар­хи тамхи, муу зуршлаа  болих хэ­рэг­тэй. Хүүх­дүүд­тэй­гээ долоо хо­ногт нэг удаа зав гаргаад ярил­­цаа­­­сай. Эцэг, эхийн хайх­рамж­­гүй зан­гаас болж хүүх­дүүд гэмт хэ­рэгт хол­бог­дож бай­на. Тиймээс  хүүх­дээ хаана,  юу хийж явааг өдөр болгон асууж, илэн далангүй ярил­цаа­рай. Бас өөрсдөө хүүх­дүүд­дээ зөв үл­гэр дууриал болоо­сой. Эцэст нь хэ­лэ­­хэд, илэн далан­гүй ярил­­цаж, зөв­­лө­­гөө өг­дөг ээж, аав­даа баярлалаа. Та хоёртой хүс­сэн зүйлээ ярилцаж чаддаг уч­раас л буруу зүйлд автахгүй, зөв замаар явж байгаа юм шүү. Хайртай шүү та хоёртоо.

Арванхоёрдугаар ангийн сурагч, Нийслэлийн шилдэг сурагч Б.Мөнх-Ирээдүй: 

-Арванхоёрдугаар ангийн най­зууд маань амьдрал гэх да­лай руу хөл тавьж, дуртай мэр­гэж­­лээ сонгоорой. Түүний­хээ тө­лөө шаргуу хөдөл­мөр­лөө­рэй гэж хэлэхийг хүсдэг юм. Том­чуу­даас хүүхэд бүр урмын үг, инээм­сэг­лэл хоёрыг хүсдэг.  Тийм болохоор хүүх­дүүд­дээ урам зориг, аз жар­га­лыг бэлэг­лэж байгаарай. Аав ээж минь на­майг өдий зэрэгтэй өсгөж хү­мүү­жүүл­сэн. Та хоёр минь юу хий­хийг хүснэ, түүнийг минь на­дад өгч юугаар ч дутаагаагүй. Най­зууд минь намайг олон төр­лийн авъяастай гэдэг. Гэхдээ энэ бүх­ний ард гэр бүлийн дэмж­лэг хамгийн ихээр тус бол­сон юм.  Хүү нь та хоёрынхоо  ит­гэ­лийг даасан мундаг хүн болж, ачийг тань хариулна.