Төрийн болон намын албан тушаалыг хэмжээлшгүй эрх мэдэл гэж хардаг “хурган” дарга нарын нэг болох Ц.Бат-Энх гэгч өнгөрөгч сар шинийн өдрүүдэд олны анхаарлын төвд байв. МАН-д нарийн бичгийн даргын албан тушаал хашдаг энэ нөхөр сар шинийн өдрүүдэд covid-19 вирусийн хоёр дахь том голомт болоод буй БНСУ-аас иржээ.
Гэвч, тус улсад хөл хорионд орохгүйн тулд Японоор дамжин нислэг хийж, “Нарита” нисэх онгоцны буудалд хоёр өдөр өнжихдөө “МИАТ” компаниас зочид буудлын төлбөр хэмээн нэг өдрийн 500 ам.доллароор тооцож мөнгө нэхсэн, мөн БНСУ-аас дамжсан 36 иргэнтэй хамт онгоцны арын суудалд тусгаарлах гэхэд л уурлаж, бизнес ангилал руу дур мэдэн шилжин суужээ. Хурган даргын ааш авир ингээд намжаагүй. Улмаар, Монголд газардахад нь тусгаарлах байр луу авч явах гэхэд нь дургүйцсэн учраас гарыг нь гавлаж авч явсан гэх мэдээлэл ч тэр үед хэвлэлээр гарсан билээ.
Өөрийгөө “корона”-г ч дийлж чадах дарга гэж итгэсэн бололтой. Хэний ч танихгүй хурган дарга ийнхүү хэдэн өдрийн дотор л соошл орчинд од болсон юм. Түүнийг Онцгой байдлын ерөнхий газрын сувилалд тусгаарлаж байгаа. Намын даргынхаа гаргасан шийдвэрийг үл тоож, дураараа дургих гэж оролдсон Ц.Бат-Энх гэгчээс болж, мөрөөрөө ажлаа хийж байсан МИАТ-ийн Коммер эрхэлсэн дэд захирал Ш.Гантулга ажлаа өгчээ.
Намын хоёрдугаар хүний “халаас”-ны хүн гэгдэх Ц.Бат-Энхэд намын дарга нь хариуцлага тооцохоор санал хүргүүлсэн ч ажлаас чөлөөлсөн гэх мэдээллийг албаны хүн үгүйсгэснээс харвал тун ч том ар тал байдаг бололтой, түүнд. Улс төрийн намд “жижигхэн” албан тушаал хашиж байхдаа увайгүй, амин хувиа хичээсэн, өөрийгөө хаан хэмээн андуурч бусдыг дорд үзэж буй энэ хүн хэрвээ төрд орж ирвэл түүнээс ч илүү занг харуулах нь мэдээж биз.
Учир нь Ц.Бат-Энх ирэх сонгуулиар Эрдэнэт хотод нэр дэвшихээр дөрвөн жил тойрог тойглож, олон янзын арга хэмжээ зохион байгуулж буй. Тэрбээр, олноо “Симба” хэмээн алдаршсан Ц.Батаа, ММСУХ-ны тэргүүн Ц.Батсайхан нарын дүү бөгөөд “Эрдэнэт” үйлдвэрт Ерөнхий захирлын орлогчоор ажиллаж байсан нэгэн билээ. Мөн Зам тээвэр, аялал жуулчлалын яамны Төрийн нарийн бичгийн даргаар ажиллаж байхдаа ажилтнаа зодсон гэх хэл аманд өртөж байсныг нь хэвлэлүүд бичиж байлаа. Угтаа улс төрд орж ирсэн ч унаган “атаман” зангаа тавиагүй хурган дарга нарын нэгийг хэн ч дийлэхгүй нь тодорхой байна.
